بسوريا، بلشت بالتمثيل بمسلس خبز وملح، من بعدها فورا بدأت بالكتابة وكتبت مسرحية اسمها “مريخ 2050” ولهلأ ما خلصتها، مو مشان شي بس لسا عم دور على نهاية حلوة من وقتها بلشت كتابة وكتبت لبرامج تلفزيونية وإذاعية وللمسرح وللسينما

هونيك اشتغلت كموظف بنك، بس استمريت بالكتابة وشاركت كمان بمجموعة من العروض المسرحية باللغة الإنجليزية

قررت صير ستاند أب كوميديان بعد نصيحة من أعز أصدقائي ورفيق العمر أبو الجود (ما بتعرفوه وما رح عرفكون عليه لأني لسا مو آخد رأيه بالموضوع) كمان شاركت بمجموعة من ورشات التمثيل مع واحد من أهم مدربين التمثيل بهوليود “توم تودوروف”

بسنة 2009 طلعت معي فكرة مسلسل أنيميشن صغير لذيذ اسمه “موقف ميكرو” وكتبته وسجلت الأصوات يللي فيه. “موقف ميكرو” استمر لحوالي 42 حلقة من 2010 لسنة 2016 وكل حلقاته موجودة عاليوتيوب

سنة 2012 كانت سنة كبيرة بالنسبة إلي، كتبت فيها مسلس الأطفال “منصور” يللي كان واحد من أهم مسلسلات الأطفال بالخليج بهديك الفترة، وكمان كنت بفريق الكتابة للنسخة العربية الأولى من برنامج “SNL بالعربي” يللي كان اسمه بهداك الوقت “SOL” وكانت تجربة لطيفة كتير وتعلمت فيها كتير بس كان في مشكلة وحيدة إنه شركة الإنتاج وقتها…

بنفس السنة، 2012، بلشت أعمل ستاند أب كوميدي، طلعت عالستيج وقدمت 20 دقيقة ضحك الجمهور فيهون 5 مرات بس … الفكرة إني من مرة واحدة أدمنت، ومن يوميتا بلشت دور على أماكن أعمل فيها ستاند أب بالعربي وبالإنجليزي واستمرت هالمرحلة 5 سنين من الضياع والمحاولات لافهم شو يعني ستاند أب كوميدي وشلون بدي أعمله

بسنة 2017، شاركت بورشة ستاند أب كوميدي بالعربي بمدرسة “دبومودي” مع أستاذي وأخي وصديقي العزيز الكوميديان الإماراتي علي السيد. بسبب هي الورشة، تفتحت عيوني تماما على عالم الستاند أب كوميدي وعرفت فعلا شو لازم أعمل ومن وين لازم بلش. بهديك السنة كنت عم مر بظروف صعبة كتير على كتير أصعدة بحياتي، بس وجود علي وزوجته…

من بعد ورشة الستاند أب مع علي بلشت أظهر ككوميديان، ورحت عملت أوديشن لكوميدي سنترال، يللي تعتبر أهم قناة مختصة بالكوميديا بالعالم، وفعلا اختاروني وطلعت على نفس البرنامج “CC Presents” -يللي شفت عليه كل أبطالي الكوميديين ومنون لوي سي كيه- بس بنسخته العربية يللي اسمها “كوميدي عالواقف”

اشتغلت كتير عالكوميديا تبعي، وما خليت فرصة أو طريقة لاطلع عالستيج إلا وعملتها، طلعت بحفلات عربية يللي فيها مطرب ورقاصة، طلعت بمهرجانات وتبهدلت، حتى طلعت عملت ستاند أب بحفل عشاء لنادي الكتاب المصري! هالشي رغم صعوبة ورغم البهدلة يللي شفتها فيه، أدى بالنهاية إنه يحكوا معي كوميدي سنترال مرة تانية، بس هالمرة، عطوني سبيشال نص…

كانت سنة صعبة، بلشت بكورونا، علقت بهولندا بسبب إغلاق المطارات 6 شهور، وهالشي أدى بالنهاية إني اتخذ القرار واترك دبي نهائيا وانتقل لعيش مع عيلتي بهولندا. بس الخب رالرائع كان إنه منصة شاهد طلبوا مني اكتب مسلسل “كريموفوبيا” من بطولة صديقي العزيز شادي ألفونس وإخراج الصديق العزيز أيضا منير بركات يللي إلو محبة خاصة بقلبي.…

بلشت تخف شوي قوانين كورونا، عملت ورشة ستاند أب لمجموعة من الطلاب أونلاين، بس كمان بلشت أول جولة كوميدية لكوميديان عربي بأوروبا برفقة سعد الغفري وجورج العين. الجولة كانت ناجحة جدا وعرضنا بفيينا، باريس، أمستردام، بروكسل وبرلين!!! طبعا بودكاستاتي طق طق وقطش ولحش كانوا بلشوا ينعرفوا بهالوقت

بلشت هالسنة بخسارتي لابن عمي وصديقي وأخي الصغير مهند دبا، مهند كان شريكي بالكتابة والتخطيط لكتير مشاريع شي منها صار وشي ما صار، بس كان الصوت يللي براسي، كان السند والرفيق يللي واقف جنبي دائما. بس خسارة مهند خلتني أمشي لقدام بقوة أكتر، هادا أقل شي بعمله لكمل اتفاقنا وأوفي بوعدي إلو. هي السنة بلشت…